على هونك عراق الخير

امر أنشد على بغداد ليش الورده ذبلانـــــه
تجاوبني بحزن مهموم مدري اني حلمانـــه
لاجاري يجير الجار لمن صاحت افلانــــه
لو جانه الدخيل أنصيح ماننطيه بحمانــــــه
قصه ماجرت بالكون شفنه الناس عريانـــه
وين الجانوا ينادون سنه وشيعه اخوانـــــــه
يوميه الجثث عالكاع محد لفها بجفانـــــــــه
وشوف الدمعه من حره تسر كلوب عدوانــه
على ديرة هلي الطيبين ليش العين عميانـــه
مااكدر أغمض العين وادري العرب غفلانــه
عمت عينه الغفه عالجور انت النبض ودمانه
موبس الوطن حزنان كل الدنيا حزنانـــــــــه
ماشاف العراق الخير من حكام جيرانــــــــه
ضحى باغلى ماعنده لجل عيون خلانــــــــه
وبأيده يوزع الزاد شبع ناس جوعانـــــــــــه
وعلم شعبه عالطيبات من اتصول فرسانـــــه
وتشهد له بعد لبنان وارض الشام وكنانـــــــه
تحزمنه وسرينه بليل يومن صاحت اقصانــه
ونزفنه وما اجانه العون ليش الدنيا خربانـــه
وباعونه برخص ياحيف كلمن يعمل بشانــــه
عكب ماجنه ملتمين كل الناس فرحانــــــــــه
صرنه بديره كلها اجناب غربه الزمن سوانه
والهاجر غصب هيهات عاش بغير اوطانـــه
يضل دومه يفر الراس فكره عاكد لسانـــــــه
يجم هاجس يجيه بليل يذكر ماضي ازمانــــه
على دجله يحن بشوك ميها والهوى دوانـــــه
على هونك عراق الخير باجر تصحى دنيانـــــــه
ويعود الوطن لهله ولازم تصفى غدرانـــــــه
يرد شعبك مثل ماجان شجره بوسطت اجنانه
يعود وترجع البسمه وبيده يعيد بنيانــــــــــــه
ونغلق صفحة الماضي ونطرد بوش واعوانه
ويصير العراق بخير وناخذ ثار نيسانـــــــــــــــه